ألا أونه.. ألا دوّه.. ألا تريه

ألا أونه.. ألا دوّه.. ألا تريه

ملوخيه بس فيليه

جاهزة علطول ع اللهط

للباشا أو للبيه

ألا أونه.. ألا دوّه.. ألا تريه

قرب وتعالى اتفرج

معانا مش بنهرج

دا معانا فلوس تتهرب

على زخزخ فى السواريه

ألا أونه.. ألا دوّه.. ألا تريه

معانا مفيش تقسيط

لا مفاصلة ولا تنطيط

يلا ومن غير تسييط

خلص ... دا مفيش هنا ليه...؟

ألا أونه.. ألا دوّه.. ألا تريه

بيعتنا دى مالهاش صاحب

والصاحب هو الراكب

والراكب مالهوش صاحب

دا الصاحب بقى إخـيــــه

ألا أونه.. ألا دوّه.. ألا تريه

سيما ومسرح وتياترو

دا حرامى وربنا ساتره

افضحوا أمه وهاتوا آخره

صوتوا يلا وقولوا هــيـــــــــــــــــــه

ألا أونه.. ألا دوّه.. ألا تريه

عـبــد الـقــادر حـيــدر

جينا يا مصر

مولد يا صاحبى ... وصاحبه غايب
واللى هايب
واللى خايف من المصايب
واللى شايف روحه شايب
واللى لشعب بلده سايب

راح يباعد

والفيران اللى بتجرى من فوق المصايد
راح نصايد
وحق ربي اللى قلبى لوحده عابد
والمعابد
والكنايس والمساجد
ع العزيمة والإرادة راح نعاهد
واللى يمس رملة من ترابك راح نكايد

واللى وادد

ييجى يصحى
دا احنا فكرة
جينا نحيي نور ظلامها
احنا بكرة

واللى كان قبل النهارده مش فى بالنا
احنا أهه ولادك يا مصر زى ما احنا
واللى شايف روحه فوقنا
يا هو يا احنا

احنا مش جايين نخرب أو ندمر
احنا بس جايين للشعب عشان يشمر
ييجى يسقى شجرة واحده عشان تثمر
احنا جايينلك يا مصر عشان نعمر

احنا فوق الضلمة نور
احنا فى البحر الجسور
مهما قالوا ... ومهما عادوا ... ومهما كترت الكسور
مهما كان ... هفضل ابنك الجسور

يلا اصحوا ... يلا عدوا ع اللى فات
دا اللى فات تاريخ ومات
واللى مايعيشى النهارده
يبقى حمــار خلاص ومــــــــــــــــــــات

عـبــد الـقــادر حـيــدر

صباح الفل

صباح الفل ع النايمين
وع القاعدين
على الضالين
وع السامعين
وع الشايفين
ومش فاهمين



صباح الفل ع اللى اتفل
وكان جده يخافه الكل
ويرحم أبوه مكنلوش حل
صباح الفل
يا عيلة تشل



صباح الفل ع النسانيس
وعايزه أى هيصه وتهيص
ووقت الجد فى شبر تليص
عيشة عاتمة ومالها بصيص



صباح الفل على مامى
وعلى دادى ...
وعلى رامى
وعلى شادى
وع ال عايش أهه عادى



صباح الفل ع اللى خلاص
بقى عايش أهه وخلاص
كفاية خلاص
لازم إخلاص
جه وقت الجد ومالنا خلاص



سنيننا الجايه مش محتاجه أى سكوت
ولا بسكوت
أهه بازعق...أهه بأنده بأعلى الصوت
كفاية اصحوا ... دا شئ ملتوت
كفاية اصحوا ... كفاية لا نموت

عـبــد الـقــادر حـيــدر

يوميات رجل مطحون

أنا كـنــــــت يوم تـعبــــــــان................ماشى وأنا مهيــــــــــــــس
عمال بجرجر رجلــــــــــــــى...............وشى بقى متيـــــــــــــــس
باضرب إيدى بكفــــــــــــــى...............طبعا ما أنا مفلـــــــــــــــــــس
لاقيت راجـــل ببـــــدلــــــــه..............شكله كده مفيــــــــــــــــــس
ماســــك مـعــــاه بطيخــــة ............وكمان أهه مكيـــــــــــــــــــس
أنا قلت طب وأنا مـــالـــــى ............دا شكله متريــــــــــــــــــــــش
بــس الـــولـيـه بـــكـيـزه ............لمحته يا ريــــــــــــــــــــــــــس
خلاص ليـلـيـتـنـا دى سـودا...........ماهو حظى متنحــــــــــــــــس
هتبهدلنى وتقطعنــــى ..........وفى لحمى هتكيـــــــــــــــس



أول ما شـــــافت وشـــــى ...........ادتنى بالشلـــــــــــــــــــــــــوت
حـضـنـتـنــى حـضـن كـــبــيــر...........وب استنى بالنبـــــــــــــــــــــــوت
طلع القديم يا ســـــــيــــــدى...........وفتحتلى فى المكبـــــــــــــــوت
أنا قلت لما أفـــــــــــــــوت .........علشان ليلتنا تفـــــــــــــــــــوت
دى وليه نكديــــــــــــــــــه ..........جواها 100 برغـــــــــــــــــــــــوت
مبهدلانى فى عيشتـــــى.......... وبقيت راجل هلفـــــــــــــــــــــوت
أهلها فى الصعيــــــــــــــد ..........كانوا بيأكلوها زلــــــــــــــــــــــوط
دا غير البت سنيــــــــــــه ..........والواد كمان سفـــــــــــــــــــــروت
دول عيالى لامؤاخـــــــذه...........خلونى بقيت مكـــــــــــــــــــــبوت



إيشى لبس وإيشى هـدوم............وإيشى دروس خصوصيــــــــــــــــة
البت فى تالته إعــــدادى......... والواد فى التوجيهيـــــــــــــــــــــة
البت قيمه وسيمـــــــه.........مخها ميه ميــــــــــــــــــــــــه
بس ماتعرفش ليــــــــــــه..........مناخيرها متنشيـــــــــــــــــــــه
عاملالى فيها أميــــــــرة...........عاملالى فيها عاطفيـــــــــــــــة
بتحب الواد عويــــــس .............ابن الحاجه شلبيـــــــــــــــــــه
دول ناس متريشــــــــين .......وحالتهم عاليه شويـــــــــــــــــــــه
عايزين طلبات كــــــــــتير...........قولولى منين يا أفنديــــــــــــــــــه
أما الواد سفــــــــــروت.........فدا مقلبظ وفشلــــــــــــــــــــــه
عايزله لحمة كــــــــــــتير..........محتاج لـ100 بستلــــــــــــــــــه
اسمه على غير مسمــــى.........وبطنه متدليــــــــــــــــــــــــــــه
بفلوسى يا ابن الايــــــــه...........عليت الحديدة عليـــــــــــــــــــــــا
وبايظلى فى التعليـــــــم .............وعايدلى التوجيهيـــــــــــــــــــة



هى دى الفاميليـــــــــا.........وهى دى العيلــــــــــــــــــــه
اللى جاى على اللى رايـح...........عيشتنا وأكيد مستــــــــــــــورة
السر فى الرضــــــــــا .........نعمة وناس منها محرومــــــــــــــة
تحمد ربك بقى...ولا تشنـق!!!!!!!!!!!ماهى كده كده مقسومــــــــــــة

عـبــد الـقــادر حـيــدر

فـي حـب النبــي

من بــين طيــات العـروق.................. كـان الـكـلام مـاشـــــى
حـــب وغـــرام للـــــــنبى................ولـقـربـه دا كـافـــــــى
دا بـفـرحـــــته ضحـكــنى................وبــدمـعـتـه بـكـانــــى
ساعــة الكـــلام عـــنـــــه...............الــقـلـب ينسانـــــــــــى
لـمـا بـكـون فــرحــــــــان................نـار حـبـه مـالـيـانـــــى
حـتى فى وقـت الضـيـــق..............الـسـنـة وانـسـانـــــــــى


بــحــبــك يـا نـبــــــــــى................والـحـب صـحـانــــــــى
من غـــفــوة الـنـســـيـان...............ودا صــك غـفـرانـــــى
من ربــــــى كـسـبـتــــه...............مـن كــتر أحـــلامـــــى
بـرؤيــتـك يـــا نبــــــى.................رغـم الـذنـوب مـالـيانى


الـنـبــى لـيه صحبتــــه................والصحـبة واحـشـانـــى
لـمـا بـإيـدى ألـمـســــه...............وبـحــبـه يـرعــانــــــــى
أصـل حـبـيـبـى النبـى................من حـبـه ورانــــــــــــى
نور..هـداية وصـلاح...................من ربـه جـابـهـالــــــــى
الـرحـمة دى دعـــوته.................بـالـرحـمـة سـابـهـالـــــى
لأجل ما أغـنى وأقول.................لـلـدنـيــا مــوالـــــــــــــــى


كـده كفايــــة خـــلاص...............ولا أقـول تــــانـــــــــــــــى
أصل القلم مش راضى..............مـن حـبـه قــال تــانــــــــــى
طــب صلى على النبى.............وقـول الـسـلام تــانــــــــــــى
وسـلام سـلام قـــــوام............وتـعـالـى أحــلامــــــــــــــــى
بـرؤيــة الحـبـيـــــــب..............الـمـصـطـفـــــى الـهــــــــادى
أصـلى هـقـول وأعـيد.............ودا بـرضــه مــــش كــافــــى
وآخرة كلامى سلامى............وصـــلـــى عـلـيــه تــانــــــــى

عـبــد الـقــادر حـيــدر

زيـــطــــــــــــــــه

لو كنت يوم زيـــــــــــــــــــــــاط...........ماشى مع الزيطـــــــــــه
ماشى فى وســط النـــــــــاس..........زايط مع الزيطــــــــــــــــه
إياك تجيك زيطـــــــــــــــــــــــه...........تزيط عليك زيطــــــــــــــه
لو زاطـــــت يوم عليــــــــــــــك..........هتعيش فى تزييطـــــــــه
مش بمزاجك يا حلــــــــــــــــو...........دى حكمة الزيطـــــــــــــه



الزيطه مش زيطـــــــــــــــــــه...........الزيطـــه دى دســـتـــــــور
رقصنى عالويكــــــــــــــــــــــا...........ركبنى عـالـحنتــــــــــــــور
أنا أعيش مع الزيطـــــــــــــــه...........علشان أعيش مستــــــور



لو يوم حبيت تزيــــــــــــــــــط..........هتزيط على اللى جابــــوك
لو زطت يزيطـــــــــــــــــــــوك..........وقوام يكتفـــــــــــــــــــوك
وهناك فى السجن يا اسطـى.........على البرش يزيطــــــــــوك



أنا زطت ولا ايــــــــــــــــــــه..........معلش يا اسمك ايــــــــــه
كله بالزيطه ماشـــــــــــــى..........طب خد خمسين جنيــــــه
وأهى زيطه تجر زيطـــــــــه..........رزقه وهتعمل ايــــــــــــــه



الزيطه هى رمـــــــــــــزى..........وحبى واعتـــــــــــــــزازى
مسكو بيها الرياســــــــــه..........ومسكو الحكومة يا بيــــــه
جرى ايه بس ايــــــــــــــه..........أنا زطت تانى ليـــــــــــــــه
ما الزيطه ماليه جـــــــيبى.........وأنا هتعب نفسى ليــــــــه



الزيطه دى حبيبتنــــــــــا..........الزيطه دى أمنـــــــــــــــــا
لو يوم بعدنا عنهــــــــــــا..........ماما سوزى بتضمنـــــــــــا
نيجى نقرأ ونتعلــــــــــم..........وعلى قفانا تلبنـــــــــــــــا



خليها تزيط عليـــــــــــك.........بس إوعى تتزيـــــــــــــــط
وإياك تزيط عليهـــــــــــا.........لتبقى متزيــــــــــــــــــــط
وممكن تزيط معاهـــــــا.........وبرضه تتزيــــــــــــــــــــــط
من الآخر زطت مازطتش.........أكيد هتتزيــــــــــــــــــــــط

عـبــد الـقــادر حـيــدر