مصري

صبرت يا بلدي ولصبري حدود
ونصرني ربي والعالم شهود
من إيه راح أخاف يا بلد!!؟
وأنا اللي ع العز عهدي من جد الجدود

"مصري"

عـبــد الـقــادر حـيــدر

مليون جمال

مليون جمال كل يوم بيتولد
وسط الظلام الشمس لازم تتوجد
لا عمره عرف العربي كلمة مستحيل
ولا عمره يوم يسمح لحلمه يتفقد

"وعجبي"

عـبــد الـقــادر حـيــدر

ليـه مكـشــر...؟

لكل حاجه سبب .. ولكل شئ تفسير
بين خطوة والتانيه .. فوق الوجود تدبير
ليه طاب مكشر , وانت اللي ربك
مع كل عسر خلقلك التيسير

"وعجبي"

عـبــد الـقــادر حـيــدر

حكيم القلوب

شوقي وساكن جوه قلبي من سنين
مبسوط ولكن جوه مني فيه أنين
رحت لحكيم القلوب .. قام صارحني
عندك تضخم في الهوى والتهاب في الحنين

"وعجبي"

عـبــد الـقــادر حـيــدر

دنيا غريبة

دنيا غريبة .. بس اللي فيها ما يتوصف
لا فيها عمر بيطول .. ولا عمر بيتقصف
أنا اللي عشت سنين أدور على مهرها
ولما خطبتها .. لقيت الموت عليا بيتحدف

"وعجبي"

عـبــد الـقــادر حـيــدر

عـجـبـــي

قالوا لي عجبي ع اللي عجبك .. قلت: عجب
وإيه اللي عمله اللي عجبكم غير إنه شجب
أنا اللي عجبي ع الزمان اتساوى فيه
اللي جاب الحق باللي بالغطره نحب

"وعجبي"

عـبــد الـقــادر حـيــدر

رسالة إلى الأعداء

لا عمرنا نسينا ولا عمرنا دبنا
والحلم عايش بس في قلوبنا
وهييجي يوم وهتعرفوا
إن الرمال دي رمالنا والطوب داهو طوبنا

أولمرت ولا باراك
الخيبة جايه وراك
لو حتى قلتوا وراكو
البوش ولا الجاك

انتو بديتو حكاية
مش قصة .. لا دي رواية
مهما هتملوا في ورق
هكتب بإيدي نهاية

عمر اللي مات مايموت
ولا اللي فات بيفوت
ولو قتلتوا البطل
فيه غيره مش بيموت

وحق رب مجيد
وابني اللي مات لي شهيد
لا عمري هخفض راسي
ولا عن طريقي هحيد

الإمضا .. عربي بجد
جمعة وسبت وحد
لا من سلامكو أنا باكل
ولا م الكفاح بتهد

عـبــد الـقــادر حـيــدر