Tuesday, April 15, 2008

جينا يا مصر





مولد يا صاحبى ... وصاحبه غايب
واللى هايب
واللى خايف من المصايب
واللى شايف روحه شايب
واللى لشعب بلده سايب

راح يباعد

والفيران اللى بتجرى من فوق المصايد
راح نصايد
وحق ربي اللى قلبى لوحده عابد
والمعابد
والكنايس والمساجد
ع العزيمة والإرادة راح نعاهد
واللى يمس رملة من ترابك راح نكايد

واللى وادد

ييجى يصحى
دا احنا فكرة
جينا نحيي نور ظلامها
احنا بكرة

واللى كان قبل النهارده مش فى بالنا
احنا أهه ولادك يا مصر زى ما احنا
واللى شايف روحه فوقنا
يا هو يا احنا

احنا مش جايين نخرب أو ندمر
احنا بس جايين للشعب عشان يشمر
ييجى يسقى شجرة واحده عشان تثمر
احنا جايينلك يا مصر عشان نعمر

احنا فوق الضلمة نور
احنا فى البحر الجسور
مهما قالوا ... ومهما عادوا ... ومهما كترت الكسور
مهما كان ... هفضل ابنك الجسور

يلا اصحوا ... يلا عدوا ع اللى فات
دا اللى فات تاريخ ومات
واللى مايعيشى النهارده
يبقى حمــار خلاص ومــــــــــــــــــــات





عـبــد الـقــادر حـيــدر

5 comments:

  1. ماشاء الله

    كتاباتك جميله كلها بلا استثناء

    لازم تعمل دواوين صغيره و تنشرها

    ربنا يوفقك

    ReplyDelete
  2. ربنا يكرمك يا رب
    ميرسى جدا
    وإن شاء الله يكون فيه نصيب وبعض الأعمال تنشر فى سلسلة مدونات مصرية للجيب

    ميرسى مرة تانية
    وسعيد جدا برأيك دا يا دكتورة

    ReplyDelete
  3. This comment has been removed by the author.

    ReplyDelete
    Replies
    1. I love you, Dr. Abdul Qadir and I ask God Almighty to bless you with righteous offspring and that always makes us together with our fathers and our mothers in the highest paradise I am your friend Osama Mamdouh message, which is in front of you is my brother, Mohamed Mamdouh

      Delete
    2. ربنا يكرمك يا أسامة ويجمعنا دايما على الخير إن شاء الله

      Delete

Copyright 2007-2010 © ABD EL-KADER HYDER All Rights Reserved